Bya Mugula Dan
Abakozi ba Munisipaali ye Mubende babiri bakwatiddwa akakiiko k’amaka g’Obwapulezidenti akalwanyisa obulyake n’obukenuzi ka Anti Graft SH nebaggulwako omusango gw’okuggya ssente ku basuubuzi b’akatale ke Mubende ka Mubende Central Market mu lukujjukujju.
Abakwatiddwa ye mumyuka wa Town Clerk, Katumba Francis Xavier n’owebyobulamu, Hakim Sentongo nga kigambibwa nti emivuyo gino baagikolera mu nteekateeka y’okusengula abasuubuzi okubazza mu katale kano.
Kigambibwa nti bano baasaba abasuubuzi abasukka mu 50 ensimbi eziri wakati w’emitwalo kkumi n’obukadde obutaano nga babasuubizza emidaala.
Waliwo alumiriza okuwa Katumba obukadde bubiri kyokka kitegeerekese nti obujulizi bwa ssente ezimu tebuliiwo kubanga zaakwasibwa bantu ssekinnomu.
Bano okunoonyerezebwako kyaddirira omumyuka wa Sipiika wa Palamenti, ThomasTayebwa okukyala e Mubende abasuubuzi nebamulombojjera emivuyo gino era naye kwekulagira akakiiko ka State House Anti-Corruption Unit kanoonyereze.
Abakwate basindikiddwa ku alimanda okutuusa nga 3 omwezi ogujja ng’okunoonyereza ku mivuyo emirala bwekugenda mu maaso.