LOOYA MALE MABIRIIZI ASEKERA MU KIKONDE; Kkooti eragidde aliyirirwe obukadde 10 lwa Palamenti kumugaana kumuwa biwandiiko bikwata ku Bobi Wine

June 1, 2024

*Omusimbi ogumusubye lwa butagenda ku LDC

BYA MUSASI WAFFE

***Mabiriizi ng’akalakaala n’entuumu y’ebitabo ku kkooti, abamumanyi bagamba musajja wa ntalo nga bw’abeera tayombye abeera awulira waliwo ekimubulako, wabula era amagezi gamwesera!***

W’OSOMERA bino, nga Looya w’omu Kampala omukambwe era atanywa guteeka, Male Mabiriizi Hassan Kiwanuka atambula akaga ng’eyakwana ow’okumpi, oluvannyuma lw’omulamuzi wa kkooti y’e Mmengo, Esther Nasambu, okulagira Palamenti emuliyirire ssente obukadde 10 obwa Uganda. Omulamuzi Nasambu, yasinzidde ku mpaaba Mabiriizi gye yateekayo nga yeemulugunya nti yagenda ku Palamenti ng’ayagala emuwe ebikwata ku Bobi Wine okuli; Yasomera wa, alina emyaka emeka, yafuna ‘Marks’ mmeka, ani yamusomesa, alina emyaka emeka, bazadde be n’ebirala, wabula abakulu ku Palamenti ne bamugamba nti by’ayagala okufuna tebabirina mu ‘DATA BASE’ yaabwe, teebakoma okwo, baamutambuzanga kumpi bw’oya kumuggwa ku ntumbwe nti komawo jjo jjuuzi. Mabirizii we yasabira ebyo, nga Bobi akyali MP wa Kyaddondo East, era omulamuzi yawadde ebiragiro bino;

***Mabiriizi azze atagaza Bobi Wine okuva lwe yalya obwa MP bwa Kayadondo East mu 2017, abamu ne balumiriza nti alabika alina b’akolera…***

*Nti Palamenti yakola nsobi obutawa biwandiiko bikwata ku Bobi Wine, nga yeekwasa mbu tebirina era yayogera byogere kyokka nga yali mukozi wa Palamenti, omulamuzi yeewunyizza ekitongole kya gavumenti nga Palamenti obutabeera na bikwata ku babaka, nti ekyo kiraga emirimu egikola mu ngeri ya kadibe ngalye ngémbwa etunda omuzigo. Agambye singa ebiwandiiko baabiwa Male, kyandimuyambye okumanya oba Bobi ofiisi eyo agirimu mu bumenyi bw’amateeka oba nedda, oba Omubanda wa Kabaka yasoma oba yalinga mu ‘kukuba ssada’.
*Mabiriizi bamuliyirire obukadde 10 olw’obudde bw’ataddemu, ssente, okunoonyereza, okukubisa empapula n’ebiringa ebyo…

*MABIRIIZI TOLI ‘ENROLLED ADVOCATE’:

Mabiriizi, n’okutuusa kati akyeremye okugenda ku LDC e Makerere, ng’agamba nti bamutega kakodyo bamuteekengako oluteekateeka olutakoma, abamu bagamba yeetaaga okugendayo ayolese amagezi amangi g’akyatuulidde mu kuwoza amateeka

Omulamuzi alina ssente z’agaanye basasule Mabiriizi ng’agamba nti teyagenda ku LDC kusoma mwaka ogwo ogusembayo ogwetaagibwa Looya yenna singa abeera waakuwandiikibwa n’ekibiina ekitwala bannamateeka, era wano yawadde eky’okulabirako ky’omusango gwa Mabiriizi ne ssaabawolereza wa Gavumenti…
*Nti okufuna ebikwata ku babaka, tekiriiimu sitaani yenna, kubanga kiyamba eggwanga okubeera n’abakulembeze abatali ba kiboggwe, era abénsa, abeesigika, abatali ba nziro, era n’okuwa embalirira eri abantu ba bulijjo abasasula omusolo omungi gwe bababibina enkye néggulo…